Tipo di empresa
Den e Dekreto di Establesimentu i Aktividat BES nan ta repartí empresanan den 4 tipo. Den e dekreto nan ta yama empresa ‘establesimentu’.
Riba e página akí
Tipo di empresa
Den e Dekreto di Establesimentu i Aktividat BES tin regla di medio ambiente pa 4 diferente tipo di empresa. Den e dekreto nan ta yama e tipo akí ‘establesimentu’.
Tin 4 tipo:
- Tipo 1: Por ehèmpel un tienda chikitu òf un ofisina. E tipo di empresa akí no tin mester di hasi notifikashon, pero mester kumpli sí ku e reglanan di e dekreto.
- Tipo 2: por ehèmpel un negoshi di hóreka, un garashi òf un kontratista. E tipo di empresa aki mester hasi un notifikashon i kumpli ku reglanan di e dekreto.
- Tipo 3: empresanan mas grandi, por ehèmpel un krùsher òf un kompania di desmantelashon di outo, tin mester di un pèrmit di medio ambiente. Nan mester hasi petishon pa un pèrmit di medio ambiente serka e outoridat kompetente (Kolegio Ehekutivo). E reglanan di medio ambiente pa e empresa ta den e pèrmit.
- Tipo 4: empresanan kompleho ku riesgo di siguridat pa hende, bestia i medio ambiente. Esakinan ta empresanan grandi pa almasenamentu i transbordo di (produkto) di zeta (petroli) i empresanan ku un kantidat mas grandi di almasenamentu di gas. Nan mester hasi petishon pa un pèrmit di medio ambiente serka e outoridat kompetente (Ministerie van Infrastructuur en Waterstaat). E reglanan di medio ambiente pa e empresa ta den e pèrmit.
Kiko ta un establesimentu
Den e Dekreto di Establesimentu i Aktividat BES e tiponan di empresa ta indiká komo ‘establesimentu’.
Loke ta un ‘establesimentu’ ta pará den e Lei bibienda popular, planifikashon espasial i maneho di medio ambiente BES. E Dekreto di Establesimentu i Aktividat BES (IAB BES) ta un dekreto ku ta basá riba e lei akí. Segun e lei akí un ‘establesimentu’ ta un empresa ku ta ehekutá su aktividat(nan) regularmente òf pa hopi tempu na un solo sitio. Habitantenan ku ta realisá aktividatnan a base komersial tambe por ta un establesimentu.
Bo empresa ta un ‘establesimentu’ ora ku kumpli ku 2 kondishon:
- E aktividat ku bo empresa ta ehekutá, ta kai bou di e definishon di un establesimentu. E definishon akí ta: ‘kada aktividat komersial ku ,dentro di un sierto límite, hende tin kustumber di realisá a base komersial òf den un magnitut manera ku ta a base komersial e ta.
- E aktividat mester ta indiká den e Dekreto di Establesimentu i Aktividat BES. Den anekso 1 di e dekreto nan ta menshoná e aktividatnan akí.