Obligashon di kuido

Kon e obligashon di kuido ta funshoná

Sierto reglanan no ta kompletamente formulá den e Dekreto di Establesimentu i Aktividat (IAB), pero nan ta kai bou di e obligashon di kuido akí. E obligashon di kuido ta hasi pues un apelashon riba responsabilidat propio di un empresa. Por haña e obligashon di kuido den artíkulo 1.4 di e Dekreto di Establesimentu i Aktividat BES (IAB).

Un aktuashon ta kai bou di e obligashon di kuido si e persona ku ta ehersé e aktividat sa òf rasonablemente por sospechá ku e aktuashon ei por tin konsekuensia desbentahoso pa medio ambiente. Keda sin hasi algu tambe por kai bou di e obligashon di kuido spesífiko.

Algun punto di atenshon serka e kriterio ‘rasonablemente’:

• No ta trata di konosementu personal di e persona ku ta ehersé e aktividat. Ta trata di loke por verwagt di un personan promedio ku ta ehersé un aktividat.
• ·No ta kompletamente kla si un komportashon ta kai bou di e obligashon di kuido? E ora ei ta mas lógiko pa elaborá esaki den regla, instrukshon pa pèrmit òf regla spesífiko pa e isla.

E obligashon di kuido pues no ta pidi lo imposibel di un hende. Tambe ta asina ku outoridat kompetente no tin mag di eksigí medida di e empresario, kaminda e gastunan òf e esfuersonan ta desproporshonal kompará ku e benefisionan pa medio ambiente.

Pa kiko e obligashon di kuido ta konta

E obligashon di kuido ta konta pa:

• estado i mantenshon di un empresa
• uso ‘ekonómiko’ di energia i materia prima
• anda ‘efisientemente’ ku awa shushi i produktonan residual
• limitashon di riesgo pa e bisindario i susesonan no komun
• regulashon di tráfiko di persona i merkansia pa i for di un empresa
• protekshon di suela, aire, awa den suela i awa na superfisie
• evitá molèster di stòf, zonido, trelmentu, holó i lus
• evitá molèster di uso di iluminashon

Obligashon di kuido i e Dekreto di Establesimentu i Aktividat BES (IAB)

Den kapítulo 2 di e Dekreto di Establesimentu i Aktividat BES (IAB) i e areglo korespondiente a elaborá regla pa empresanan di tipo I i tipo II a base di e obligashon di kuido. Den e reglanan akí nan a elaborá por ehèmpel kon mester protehá suela.

Un empresa semper tin un responsabilidat propio pa pensa tokante posibel konsekuensianan desbentahoso pa medio ambiente.

Obligashon di kuido i pèrmit di medio ambiente

Den e pèrmit di medio ambiente nan a inkluí vários instrukshon pa klarifiká e obligashon di kuido. Den e pèrmit tin kiko por verwagt di un empresa, di manera ku no ta surgi daño na medio ambiente. Tambe ora tin instrukshonnan amplio den e pèrmit, te ainda e obligashon di kuido ta keda na vigor.

Un empresa semper tin un responsabilidat propio pa pensa tokante posibel konsekuensianan desbentahoso pa medio ambiente.

Supervishon i mantenshon di lei

E outoridat kompetente por mantené lei direktamente riba e artíkulo di obligashon di kuido. Importante ta ku e outoridat kompetente ta investigá promé si e empresa sa òf tabata por sa ku e aktividat por okashoná daño na medio ambiente.