Solisitut di permit di medio ambiente

Riba e página akí:

• Ki ora mester hasi petishon pa un pèrmit di medio ambiente
• Na unda mester hasi petishon
• Kiko ta ‘Mihó téknikanan disponibel’
• Ki ora tin mester di siguridat finansiero

Ki ora mester hasi petishon pa un pèrmit di medio ambiente

Si bo empresa ta un empresa di tipo 3 òf tipo 4, e ora ei bo tin ku hasi petishon pa un pèrmit di medio ambiente. Un empresa di tipo 3 ta por ehèmpel un empresa ku ta desmantelá outo, un krùsher òf un sitio pa dùmp produktonan residual.

Un empresa di tipo 4 ta un empresa mas kompleho kaminda tin kestion di riesgo di siguridat pa hende, bestia i medio ambiente. Esakinan ta empresanan grandi pa almasenamentu i transbordo di (produktonan) di zeta (petroli) i empresanan ku un kantidat mas grandi di almasenamentu di gas (mas ku 10 tòn).

Si bo empresa ta di tipo 3 òf tipo 4, bo ta haña den anekso 1 di e Dekreto di Establesimentu i Aktividat BES.

Na unda mester hasi petishon

Pa lantamentu i disponé di un empresa di tipo 3 òf tipo 4 den operashon, semper tin mester di un pèrmit di medio ambiente.

Bo ta hasi un petishon por eskrito pa un pèrmit di medio ambiente serka Kolegio Ehekutivo (den kaso di un tipo 3) òf serka minister di Infrastruktura i Maneho di Awa (den kaso di tipo 4).

Kiko ta ‘Mihó téknikanan disponibel’

Den e pèrmitnan di medio ambiente nan a inkluí eksigensianan ku komo empresa bo tin ku kumpli kuné. E eksigensianan akí ta basá riba e ‘Mihó téknikanan disponibel’ (Beste beschikbare technieken – BBT). E BBT-nan ta e métodonan mas efektivo ku ta téknikamente i ekonómikamente faktibel, pa prevení emishonnan i otro konsekuensianan desbentahoso pa medio ambiente di un empresa. Kua e téknikanan akí ta, ta diferente pa diferente empresa. Por ta por ehèmpel aplikashon di un téknika ku ta okashoná ménos shushi òf un medida di fuente (manera fangu òf infiltrá awa di yobe).

Na momentu di otorgashon di e pèrmit di medio ambiente e outoridat kompetente ta wak e BBT ku ta bini na remarke pa establesimentunan di tipo 3 i tipo 4. Den esaki e outoridat kompetente ta tene kuenta ku entre otro e tipo di empresa i kua instalashonnan i prosesonan ta tuma lugá den e empresa, e sirkunstansianan geográfiko i sirkunstansianan lokal di medio ambiente.

E téknikanan mester ta ekonómikamente i téknikamente faktibel den e sektor empresarial na kua e empresa ta pertenesé. E téknikanan mester ta rasonabelmente optenibel riba merkado tambe. Finalmente e outoridat kompetente ta evaluá si e BBT ta keda apliká na e manera korekto.

E reglanan tokante e BBT ta den artíkulo 3.4 di e Dekreto di Establesimentu i Aktividat BES.

Ki ora siguridat finansiero ta nesesario

Si komo empresa bo ta traha ku kantidatnan grandi di supstansianan di riesgo haltu, e ora ei den e pèrmit di medio ambiente por inkluí e obligashon ku e empresa ta paga pa e gastunan di eventual daño na medio ambiente. Esaki nan ta yama siguridat finansiero. Ta trata di por ehèmpel kontaminashon di suela.

E reglanan tokante siguridat finansiero ta den artíkulo 3.7 di e Dekreto di Establesimentu i Aktividat BES.