Kambio di e pèrmit di medio ambiente
Si bo tin un empresa (establesimentu) di tipo 3 òf 4 i nan a otorgá un pèrmit di medio ambiente pa bo empresa i tin kambionan ta tuma lugá den operashon di e empresa, e ora ei mester pone esaki na konosementu di e outoridat kompetente. Bou di sierto kondishonnan hasi un notifikashon ta sufisiente. Si e kambio tin konsekuensianan mas grandi i esaki no ta korespondé mas ku e pèrmit di medio ambiente ku a otorgá, e ora ei mester hasi petishon pa un kambio di e pèrmit di medio ambiente.
Riba e página akí
- Ki ora un notifikashon ta sufisiente
- Kua ta e informashonnan ku bo tin mester pa e notifikashon
- Kiko ta pasa despues di e notifikashon
Ki ora un notifikashon ta sufisiente
Ora ku bo ta bai hasi kambio na bo empresa i e kambionan akí ta kumpli ku tur kondishon menshoná akí bou, den mayoria kaso hasimentu di un notifikashon ta sufisiente.
E kondishonnan:
- E kambio no ta kondusí na otro konsekuensianan desbentahoso òf konsekuensianan desbentahoso mas grandi pa medio ambiente, ku ta pèrmití den e pèrmit di medio ambiente ku ta na vigor.
- E kambio no ta kondusí na un otro establesimentu, ku esun pa kua a otorgá e pèrmit.
- No tin un obligashon pa traha un raportahe di impakto riba medio ambiente.
Si bo a kumpli ku tur kondishon, e ora ei bo por informá serka e outoridat kompetente pa un empresa di tipo 3 (Kolegio Ehekutivo) òf e outoridat kompetente pa un empresa di tipo 4 (minister di Infrastruktura i Maneho di Awa) si un notifikashon ta sufisiente pa e kambio di bo empresa.
Kiko ta bai den e notifikashon
Den e notifikashon bo ta suministrá en todo kaso e siguiente informashonnan:
- Informashon di doño di e pèrmit: nòmber, adrès, number di telefòn i emailadrès.
- E pèrmitnan ku ta na vigor pa e establesimentu.
- E kambio deseá di e establesimentu òf e funshonamentu deseá di e establesimentu.
- E informashonnan ku ta indiká di kua partinan di e pèrmit(nan) ta desviá i den kua grado ta desviá di esakinan.
- Un pintura di e situashon kaminda ta indiká e kambio deseá.
- E informashonnan ku ta indiká ku e kambio deseá no ta kondusí na otro konsekuensianan desbentahoso òf konsekuensianan desbentahoso mas grandi pa medio ambiente ku segun e pèrmit tin mag di okashoná.
- E fecha riba kua e kambio deseá ta bai tuma lugá.
Kiko ta pasa despues di e notifikashon
Dentro di 6 siman e outoridat kompetente tin ku reakshoná riba e notifikashon di e kambionan deseá. E outoridat kompetente ta hasi esaki ku un deklarashon por eskrito, den kua tin pará ku nan ta evaluá si e kambio deseá no ta duna motibu pa un petishon nobo pa pèrmit.
Ta te despues ku e outoridat kompetente duna pèrmit, e empresa tin mag di ehekutá e kambionan deseá. Si e outoridat kompetente ta di opinion ku e kambio tin otro konsekuensianan i konsekuensianan mas grandi pa medio ambiente ku e pèrmit ta pèrmití, e ora ei e por disidí ku mester kambia e pèrmit di medio ambiente eksistente. Pa esaki bo tin ku entregá un petishon pa kambio di e pèrmit serka e outoridat kompetente. Si e outoridat kompetente disidí positivamente riba e notifikashon, e ora ei dentro di dos siman e tin ku publiká e pèrmit relashoná ku e notifikashon. Banda di esei tur hende ku ta deseá esaki por tira un bista den e notifikashon.