Raportahe di impakto riba medio ambiente

Riba e página akí:

• Kiko ta un raportahe di impakto riba medio ambiente i kiko ta un evaluashon ‘mer’
• Ki ora bo ta keda enbolbí ku un raportahe di impakto riba medio ambiente òf ku un evaluashon ‘mer’
• Kon un evaluashon ‘mer’ òf un raportahe di impakto riba medio ambiente ta tuma lugá

Kiko ta un raportahe di impakto riba medio ambiente i kiko ta un evaluashon ‘mer’

Ora ku bo ta kuminsá ku un empresa òf bo ta bai amplia esaki, kisas mester ehekutá un raportahe di impakto riba medio ambiente òf un evaluashon ‘mer’. Den e rapòrt mester inkluí e (eventual) konsekuensianan pa medio ambiente i e bisindario. A base di e raportahe akí e outoridat kompetente (Kolegio Ehekutivo òf minister di Infrastruktura i Maneho di Awa) ta tuma un desishon tokante e aktividat ku bo tin planiá, pa kua un pèrmit di medio ambiente ta nesesario.

Ki ora bo ta keda enbolbí ku un raportahe di impakto riba medio ambiente òf un evaluashon ‘mer’

Ora ku bo hasi petishon pa un pèrmit di medio ambiente bo por haña bo enbolbí ku un raportahe di impakto riba medio ambiente. Òf ora bo ta bai amplia bo empresa. Pa kua aktividat un raportahe di impakto riba medio ambiente ta obligatorio, bo ta haña den kolumna 1, parti B den anekso 2 di e Dekreto di Establesimentu i Aktividat BES.

Den algun kaso e raportahe di impakto riba medio ambiente ta konektá tambe na e lugá kaminda e aktividat ta planiá. Si e lugá ei ta situá den un área ku ta vulnerabel pa medio ambiente, e ora ei un raportahe di impakto riba medio ambiente ta obligatorio. Esakinan ta por ehèmpel áreanan ku nan a indiká komo parke di naturalesa, patrimonio kultural òf área Ramsar.

Pa algun aktividat mas chikitu na tamaño tin un obligashon pa un evaluashon ‘mer’. Esaki ta nifiká ku e outoridat kompetente (Kolegio Ehekutivo) mester tuma un desishon si tin konsekuensianan negativo importante di e aktividat. Ora ku no ta bon kla si por ferwagt konsekuensianan negativo pa medio ambiente, e obligashon pa un raportahe di impakto riba medio ambiente ta na vigor. Por haña esaki den kolumna 1 di parti C den anekso 2 di e Dekreto di Establesimentu i Aktividat BES. Pa tur aktividat ku ta tuma lugá den un área sensibel òf un zona bùfer di un área sensibel i ku por tin konsekuensia dañino pa e paisahe òf e balornan di paisahe òf naturalesa òf e balornan di naturalesa, tambe un obligashon pa un evaluashon ‘mer’ ta na vigor.

Kon un evaluashon ‘mer’ òf un raportahe di empakto riba medio ambiente ta tuma lugá

E raportahe di impakto riba medio ambiente ta konektá na e prosedura pa e pèrmit di medio ambiente. Un raportahe di impakto riba medio ambiente ta forma parti di e petishon pa un pérmit di medio ambiente.

Esun ku ta tuma inisiativa por ta tantu un empresa komo un organisashon di gobièrnu. Esun ku ta tuma inisiativa pa e aktividat ku obligashon di ‘mer’, ta laga ekspertonan rekonosé di ‘mer’ formulá un raportahe di impakto riba medio ambiente, riba su propio gastu i bou di su responsabilidat. E kondishonnan ta den kapítulo 7 di e Lei bibienda popular, planifikashon espasial i maneho di medio ambiente BES.