Splikashon kòrtiku di e reglanan di medio ambiente
E aktividatnan di empresanan por tin konsekuensia pa medio ambiente i ambiente di biba. Pensa riba desperdisio, awa shushi,hasimentu di sonido òf trahamentu ku supstansianan ku ta dañino pa suela. Pa protehá medio ambiente i ambiente di biba mas tantu posibel, tin regla di medio ambiente. E reglanan akí ta den e Dekreto di Establesimentu i Aktividat BES (Inrichtingen- en activiteitenbesluit BES - IAB BES).
Riba e página akí
- Kiko ta e Dekreto di Establesimentu i Aktividat BES
- Tipo di empresa
- Ki ora mester hasi notifikashon
- Reglanan general
- Pèrmit di medio ambiente
- Ken ta tene supervishon riba e reglanan i disidí riba un pèrmit di medio ambiente
Kiko ta e Dekreto di Establesimentu i Aktividat BES
E reglanan di medio ambiente pa empresanan Karibense Hulandes ta den e Dekreto di Establesimentu i Aktividat BES. Pa medio di e reglanan di medio ambiente akí, empresanan por emprendé na un manera sostenibel i asina medio ambiente, naturalesa i ambiente di biba di hende i bestia ta bira mas limpi i mas seif. E dekreto ta stipulá kua notifikashon bo tin ku hasi i ki ora mester hasi esaki, òf ku bo tin ku hasi petishon pa un pèrmit di medio ambiente. E dekreto ta sòru tambe pa ménos preshon di regla i ménos peso atministrativo pa mundu empresarial, pa motibu ku ménos empresa tin ku hasi petishon pa un pèrmit.
Mas informashon:
Tipo di empresa
E dekreto konosé 4 tipo di empresa: tipo 1, 2, 3 i 4.
Ta indiká e tipo di empresanan akí komo ‘establesimentu’. Bou di kua tipo di establesimentu bo empresa ta kai, ta dependé di e aktividatnan ku bo empresa ta ehekutá i e influensia di e aktividatnan akí riba medio ambiente.
Pa empresanan di tipo 1 i tipo 2 e reglanan general di e dekreto akí ta na vigor.
Empresanan di tipo 3 òf 4 mester hasi petishon pa un pèrmit di medio ambiente.
Tin mas informashon riba:
Ki ora mester hasi notifikashon
Ta solamente obligatorio pa hasi notifikashon ora ku bo empresa ta un empresa di tipo 2. Un empresa di tipo 1 no tin mester di hasi notifikashon.
Mester hasi e notifikashon pa mas tardá kuater siman promé ku inisio òf kambio di bo empresa.
Ora di hasi notifikashon bo tin ku entregá datonan i informashon tokante por ehèmpel e sitio, e aktividatnan di bo empresa i e number di inskripshon na Kámara di Komèrsio.
Mas informashon bo por haña riba:
Reglanan general
Si bo empresa ta ehekutá aktividatnan ku tin un influensia leve òf limitá riba medio ambiente, e ora ei bo empresa ta un empresa di tipo 1 òf 2.
Kua e aktividatnan akí ta, bo ta haña den anekso 1 di e Dekreto di Establesimentu i Aktividat BES.
Pa empresanan di tipo 1 i 2 reglanan general ta na vigor. Esaki ta nifiká ku pa tur empresa e mesun reglanan ta na vigor. Bo no tin mester di hasi petishon pa un pèrmit di medio ambiente.
Mas informashon bo por haña riba:
- Reglanan general
Pèrmit di medio ambiente
Si bo empresa ta ehekutá aktividatnan ku ta kompleho òf ku por kousa peliger pa medio ambiente, e ora ei un pèrmit di medio ambiente ta nesesario. Por ehèmpel si bo ta kria hopi bestia òf bo ta desmantelá vehíkulo di motor.
Kua aktividat esakinan ta, bo ta haña den anekso 1 di e Dekreto di Establesimentu i Aktividat BES.
Empresanan ku un pèrmit di medio ambiente semper ta di tipo 3 òf 4.
Si bo tin un empresa di tipo 3, e ora ei bo ta hasi e petishon pa un pèrmit di medio ambiente serka gobièrnu di Boneiru.
Si bo tin un empresa di tipo 4, e ora ei bo ta hasi e petishon pa un pèrmit di medio ambiente serka minister di Infrastruktura i Medio Ambiente.
Mas informashon:
Ken ta tene supervishon riba e reglanan i ta disidí tokante un pèrmit di medio ambiente
Esun ku ta tene supervishon pa wak si ta kumpli adekuadamente ku e reglanan di medio ambiente òf ku ta formulá instrukshonnan ku ta desviá for di e reglanan general, nos ta yama ‘outoridat kompetente’.
Den e dekreto bo por haña ken ta e outoridat kompetente pa e diferente tiponan di empresa.
Mayoria biaha Kolegio Ehekutivo ta outoridat kompetente. Minister ta outoridat kompetente pa sierto empresanan industrial kompleho.
Mas informashon bo por haña riba: