Hóreka

Riba e página akí:

Kiko bo mester sa tokante e reglanan pa un empresa di hóreka:

• Splikashon di e aktividat
• Notifikashon
• Kua ta e reglanan ku ta na vigor
• Pèrmit di medio ambiente
• Lista di chekeo

Splikashon di e aktividat

E aktividatnan di hotèl, restorant, bar (hóreka) i empresanan similar tin di haber ku medio ambiente. Ta trata di preparashon di kuminda, uso di un djènereiter, instalashon pa fria òf un pisina. Otro aktividatnan den hóreka tambe por tin di haber ku medio ambiente i e bisindario. Por ehèmpel sonido, awa shushi, holó, energia i supstansia residual. Pa e aktividatnan akí tin regla.

Notifikashon

Un empresa di hóreka mayoria biaha ta un establesimentu tipo 2. Esaki ta nifiká ku 4 siman promé ku inisio òf kambio di bo empresa di hóreka, bo tin ku hasi un notifikashon na Kolegio Ehekutivo. Den kaso di kambio un notifikashon ta solamente nesesario si ta surgi un desviashon for di otro informashonnan ku bo a entregá. Mas informashon tokante notifikashon ta riba e página Notifikashon.

Kua ta e reglanan ku ta na vigor

E aktividatnan mas komun den hóreka pa kua regla di medio ambiente ta na vigor, ta preparashon di kuminda, uso di un djènereiter (instalashon pa generá koriente), instalashon pa fria of terasa. Banda di esaki tin regla pa desperdisio, awa shushi i sonido.

Pa kombatí molèster di holó mester tin un instalashon pa chupa holó. Via un pipa riba dak mester deshasí di e holó di kushinamentu ku e intalashon ta chupa.

Mester hasi mantenshon na un instalashon pa fria. Riba e página Instalashon pa fria bo ta haña mas informashon tokante esaki.

Desperdisio mester keda almasená separadamente den e empresa: papel i karton apart i glas apart. Mes tantu biaha ku ta nesesario bo tin ku laga un kolektadó rekonosé bin kolektá desperdisio. E desperdisio no tin mag di okashoná molèster di holó.

Awa shushi for di den kushina mester pasa atraves di un instalashon pa separá vèt. Despues por manda e awa aki den kloaka. Si no tin kloaka kaminda bo empresa ta situá, e awa shushi tin ku bai den un tanki séptiko. Otro awa shushi tambe mester bai den kloaka òf den un tanki séptiko. Ta pèrmití pa manda awa shushi temporalmente den un berpùt. Pa esaki derecho di transishon ta na vigor. Esaki ta pará den artíkulo 4.1.1 di e Areglo Establesimentu i Aktividat BES.

Pèrmit di medio ambiente

No tin mester di un pèrmit di medio ambiente pa aktividatnan típiko di hòreka. Sí t’asina ku un empresa di hóreka por tin mester di un pèrmit di medio ambiente pa un otro motibu.

Un motibu por ta por ehèmpel ku bo ta den poseshon di lo siguiente:

• un djènereiter ku un potensia nominal mas grandi ku 20 kW
• un instalashon pa fria ku un kontenido pa kada instalashon di mas ku 1500 kilo di amoniak òf
• un instalashon pa fria ku un kontenido pa kada instalashon di mas ku 100 kilo di propano, butano òf un meskla di propano i butano

Un hotèl tambe ku 10 kamber òf ku ta situá mas den un área sensibel, manera un área protehá designá den e plan di desaroyo teritorial, òf den un zona di bùfer di un área sensibel tin mester di un pèrmit di medio ambiente. E deskripshonnan di loke ta un área sensibel òf un zona di bùfer di área sensibel, ta den artíkulo 1.1 di e Areglo di Establesimentu i Aktividat BES.

Den anekso 1 di e Areglo di Establesimentu i Aktividat BES tin tur aktividat pa kua bo tin ku pidi un pèrmit di medio ambiente. Tin ora tin mester di un raportahe di impakto riba medio ambiente (MER) tambe huntu ku e petishon pa un pèrmit di medio ambiente. Esaki ta e kaso serka e ehèmpel di un hotèl.

Mas informashon bo ta haña riba e página Pérmit di medio ambiente i e página Raportahe di impakto riba medio ambiente (MER).

Lista di chekeo

• Tin un instalashon pa separashon di vèt pa e awa shushi ku ta sali for di den kushina?
• A tuma medidanan pa limitá molèster di holó kaminda tin bibienda?