Pregunta i kontesta tokante notifikashon

Pregunta:

Kiko nan ke mèn ku ‘lantamentu di un establesimentu’ ora di hasi un notifikashon?

Kontesta:

‘Lantamentu’ ta nifiká: kuminsá ku un empresa na un lokalidat. Esaki por ta un establesimentu nobo tambe di un empresa na un otro lokalidat.

Bo tin ku hasi un notifikashon pa e ‘lantamentu’ ora ku:

• bo ta kuminsá ku un empresa nobo
• bo tin un empresa tipo 2 i bo no a hasi un notifikashon ainda
• bo tin un empresa tipo 1 ku ta bira un empresa tipo 2 pa motibu di ekspanshon of kambio di un aktividat.

No ta tur ora bo tin ku hasi un notifikashon den kaso di lantamentu, por ehèmpel ora ku:

• bo ta tuma un empresa over i bo ta sigui ku e mesun aktividatnan
• nan ta basha bo edifisio komersial abou, pa despues traha un edifisio nobo den kua bo ta sigui ku e mesun aktividatnan.

Pregunta:

Kua informashon mi tin ku entregá na ‘tipo i grandura di e aktividat’ ora di hasi un notifikashon?

Kontesta:

Ora di hasi un notifikashon bo tin ku entregá algun informashon. Un di e informashonnan ku bo tin ku entregá ta bai tokante ‘tipo i grandura’ di e aktividatnan den bo empresa. Esaki ta nifiká ku bo tin ku deskribí kua ta e aktividatnan i eventualmente e prosesonan ku ta tuma lugá den bo empresa.

Esaki por ta trata di:

• e oranan di trabou i e kantidat di empleado ku ta ehersé aktividat den bo empresa
• un deskripshon di e trabounan di un aktividat. Por ehèmpel den kaso di drechamentu di outo esaki por ta trata di: tèst motor, spùit, tratamentu ku tectyl òf den kaso di prosesamentu di metal por ta trata di zagmentu, lasmentu i montahe
• nivel di sonido di por ehèmpel mashin òf músika
• kua i kuantu bòter di gas tin den e empresa i na unda i kon ta warda nan
• kua ta e supstansianan peligroso ku tin den e empresa i kon i na unda ta warda nan
• ki tipo di awa shushi bo ta deshasí di dje, banda di deshasí di awa shushi doméstiko, manera deshasí di awa di un ‘carwash’, di un pòmp di gasolin i awa shushi ku ta kontené vèt prosedente di kushinamentu di kuminda den un restorant.

Ora ku bo ta hasi notifikashon di un kambio di bo empresa, mester ta evidente ku kua partinan di bo empresa e kambio ta relashoná.

E informashon tokante kua ta e aktividatnan ku ta tuma lugá den bo empresa ta nesesario pa e outoridat kompetente haña un bista tokante kua ta e efektonan riba e bisindario ku por spera di e aktividat.

Pregunta:

Pa kua kambio bo tin ku hasi un notifikashon na e outoridat kompetente, i pa kua kambio esaki no ta nesesario?

Kontesta:

Ora bo ta bai kambia òf ekspandé bo empresa òf ora bo ta bai stòp ku bo empresa, bo tin ku hasi notifikashon di esaki na e outoridat kompetente.
Un kambio di bo empresa por nifiká por ehèmpel ku:

• bo ta kuminsá òf bo ta bai kuminsá ku un aktividat nobo
• bo ta kambia e kapasidat di produkshon òf e oranan ku bo empresa ta den funshon

Tin 1 eksepshon importante: ora ku anteriormente ya kaba bo a hasi un notifikashon i mediante e kambio no ta surgi un desviashon for di e informashonnan di bo empresa ku anteriormente bo a hasi notifikashon di dje, e ora ei bo no tin mester di hasi un notifikashon nobo.