Pregunta i kontesta tokante kua aktividat ta kai bou di e Dekreto di Establesimentu i Aktividat BES

Pregunta:

Mi tin un negoshi di hóreka, mi negoshi ta kai bou di e reglanan di medio ambiente di e Dekreto di Establesimentu i Aktividat BES?

Kontesta:

Si, si bo tin un negoshi di hóreka bo negoshi ta kai bou di e reglanan di medio ambiente di e Dekreto di Establesimentu i Aktividat BES. Un negoshi di hóreka por ta un restorant, bar, snèk, negoshi di ‘catering’, hotèl òf penshon.

Aktividatnan ku ta tuma lugá na un negoshi di hóreka i ku ta pará den anekso 1 di e Dekreto di Establesimentu i Aktividat BES ta:

• preparashon di kuminda
• almasenamentu di produkto residual
• instalashon pa fria
• generator
• deshasí di awa shushi doméstiko.

Negoshi di hóreka mayoria biaha ta negoshi tipo 2. Bo tin ku hasi un notifikashon serka e outoridat kompetente (Kolegio Ehekutivo). Bo tin ku hasi un notifikashon tambe ora bo ta kuminsá òf kambia bo negoshi.

Pregunta:

Un sitio di konstrukshon ta kai bou di e reglanan di medio ambiente di e Dekreto di Establesimentu i Aktividat BES?

Kontesta:

Mayoria biaha nò.

Na promé lugá un aktividat ku ta dura ménos ku 6 luna no ta kai bou di e konsepto ‘establesimentu’ manera esaki ta inkluí den e Lei di bibienda popular - ordenamentu teritorial - maneho di medio ambiente BES (Wet volkshuisvesting ruimtelijke ordening milieubeheer BES) i pa e motibu akí e no ta kai bou di e reglanan di medio ambiente di e Dekreto di Establesimentu i Aktividat BES. Tambe si e aktividat ta dura mas largu ku 6 luna, no ta sigur tampoko si un sitio di konstrukshon ta kai bou di e reglanan di medio ambiente.

Esaki pasobra aktividat di konstrukshon mes no ta inkluí den e Dekreto di Establesimentu i Aktividat BES. Segun anekso 1, parti 1.2 di e Dekreto di Establesimentu i Aktividat BES, motor na un sitio di konstrukshon ta ekskluí pasobra nan ta temporalmente einan. Ademas, temporal por ta mas tantu tambe ku e 6 luna menshoná akí riba.

T’asina sí ku tin otro aktividat por tuma lugá na un sitio di konstrukshon, di manera ku un sitio di konstrukshon ta kai tòg bou di e reglanan di medio ambiente. Pensa por ehèmpel riba almasenamentu di semènt òf palu.

Un sitio di konstrukshon mayoria biaha lo ta un tipo 1 òf 2. E chèns ku un pèrmit di medio ambiente tipo 3 ta nesesario, ta hopi chikitu.

Pregunta:

Mi empresa tin obligashon di pèrmit si mi tin un instalashon pa fria ku 1200 kg di propano den funshon?

Kontesta:

Si, den anekso 1, parti 2.3, sub n) di e Dekreto di Establesimentu i Aktividat BES a stipulá e límite pa propano i butano na 100 kg pa e obligashon di pèrmit. Pa amoniak (NH3) e límite ta na 1500 kg. Pa instalashon di fria ku dióksido di karbon (koolstofdioxide) komo medio pa fria no tin un obligashon di pèrmit.

Pregunta:

Un foodtruck, trùk’i pan òf un otro tipo di restorant riba wil ta kai bou di e reglanan di medio ambiente di e Dekreto di Establesimentu i Aktividat BES?

Kontesta:

Si bo tin un foodtruck, trùk’i pan òf un otro tipo di restorant riba wil, kaminda bo ta prepará i bende kuminda, posibelmente bo negoshi ta kai bou di e reglanan di medio ambiente di e Dekreto di Establesimentu i Aktividat BES.

Bo tin ku mantené bo mes na e reglanan di medio ambiente, na momentu ku regularmente bo ta prepará òf bende kuminda for di e mesun lokalidat. Ora esaki ta tuma lugá 1 biaha so òf algun biaha pa aña, e ora ei probablemente bo aktividat no ta kai bou di e reglanan di medio ambiente di e Dekreto di Establesimentu i Aktividat BES. Posibelmente bo tin ku pidi un otro pèrmit sí, manera un pèrmit di evento.