Separadó di vèt

Riba e página akí ·

• Evitá vèt den awa shushi
• Kon un separadó di vèt ta funshoná
• Puntonan di atenshon na momentu di instalashon i uso di un separadó di vèt
• Reglanan di kalkulashon pa un separadó di vèt
• Mantenshon

Na momentu di prepará kuminda – manera ora di hasa kos den kushina di un restorant – por surgi awa shushi ku ta kontené vèt, ku nos no por laga bai sin mas. E vèt den e awa shushi ta kuaha i ta keda pegá den kloaka. Esaki ta okashoná un kapasidat redusí di desagwe di e kloaka i por kondusí na opstrukshon.

Evitá vèt den awa shushi

Awa shushi di un kompania no tin mag di kontené produktonan ku por okashoná opstrukshon di kloaka. Esaki ta tuma lugá por ehèmpel ora laga sobrá di kuminda bai den kloaka pa medio di un aparato di mula kuminda. Zeta òf vèt di animal òf zeta òf vèt vegetal no tin mag di resultá den awa shushi. No ta nesesario pa vèt resultá den awa shushi. Un medida pa tene vèt for di awa shushi, ta pa semper kita restu di kuminda promé den forma seku for di aparatonan di den kushina i tayó etc. E restunan akí di zeta i vèt por bai den kliko. E ora ei na momentu di laba tayó etc., ménos vèt òf zeta ta bini liber.

Kon un separadó di vèt ta funshoná

Un separadó di vèt òf un pos pa fangu vèt ta un fasilidat di purifikashon pa awa shushi. Un separadó ta saka zeta i vèt di animal i zeta òf vèt vegetal for di awa shushi, promé ku manda e awa shushi den kloaka. Ku esaki ta evita ku e vèt (ku a kuaha) ta pega den kloaka i okashoná opstrukshon. Un separadó di vèt ta funshoná pa medio di hasi uso di gravedat. E partinan lihé (vèt i zeta) den awa shushi ta drif riba e partinan mas pisá (restu di kuminda i tera) i nan ta senk bai abou. E proseso di separashon akí ta tuma poko tempu sí. Pa e motibu akí e separadó tin mester di un sierto grandura. Pa medio di pone skòt, ta frena e awa shushi ku ta pasa den e separadó di vèt. E material ku por senk (lodo) ta sak bai abou i e partinan ku por drif (vèt) ta subi bai na superfisie. E lodo i e vèt ta keda tras den e separadó. Seguidamente e awa shushi sin e partinan akí por kore bai den kloaka. Den e pintura akí bou nos a resumí e funshonamentu.

Kon e separadó di lodo i vèt ta funshoná

Puntonan di atenshon na momentu di instalashon i uso di un separadó di vèt

Tin diferente separadó di vèt posibel pa kada situashon. Nos no a skohe pa inkluí un sierto grandura den e reglanan, pa motibu ku esaki e ora ei pa un sierto kompania ta muchu grandi i pa un otro e ta muchu chikitu. Den kaso di un kantidat limitá di awa shushi un separadó di vèt chikitu por ta sufisiente. Por pone esaki bou di e baki di laba tayó. Den kaso di un kushina profeshonal tin mester di un separadó di shushi mas grandi. Por pone esaki riba vlur. Tin sierto reglanan di kalkulashon pa sinkronisá un separadó di vèt ku situashon di e kompania. Puntonan di atenshon pa instalashon di un separadó ta:

1. Un bon tamaño òf kontenido di e separadó

2. Temperatura di e awa shushi

3. Kantidat di vèt i lodo

4. Uso di produktonan di limpiesa

5. No hasi uso di un aparato pa mula kuminda

1. Un bon tamaño òf kontenido di e separadó

Pa kompra di un separadó di vèt ta importante pa determiná tamaño di e separadó di vèt. Pa un bon funshonamentu ta importante pa vèt tin sufisiente tempu pa bin drif ariba. Sino e vèt ta bai huntu ku e awa shushi i ta kuaha te ora e ta den kloaka. E tamaño ta determinante tambe pa e tempu ku e awa shushi tin pa fria, di manera ku e vèt ta bin drif ariba. Tin sierto reglanan di kalkulashon pa kalkulá e tamaño.

2. Temperatura di e awa shushi

Ora ku temperatura di e awa shushi ta keda haltu den e separadó di vèt, e vèt ta keda den forma disolvé. E ora ei e no ta keda tras den e separadó i ta te den e pos di pòmp òf den kloaka e ta kuaha. E lugá kaminda ta pone e separadó di vèt den e tuberia di awa shushi i tamaño di e separadó, tin influensia riba e temperatura. Un separadó direktamente bou di e baki di spula no ta funshoná bon ku awa shushi ku tin un temperatura haltu.

3. Kantidat di vèt i lodo

Den e separadó ta fangu lodo i vèt. Esaki ta nifiká ku de bes en kuando mester saka esakinan. Muchu hopi lodo i vèt ku a keda tras ta okashoná ku e separadó no ta funshoná bon.

4. Uso di produktonan di limpiesa

Anda kuidadosamentu ku produktonan di limpiesa. Produktonan di limpiesa ta ‘disolvé’ vèt den awa. Ku e produkto korekto e meskla akí ta habri for di otro atrobe den e separadó i e vèt ta keda den e separadó. Ku un produkto robes di limpiesa òf den kaso di uso robes, tin chèns ku ta te despues di e separadó di vèt e meskla ta habri for di otro. E ora ei e vèt ta kuaha mas leu den e kloaka i ta kondusí tòg na opstrukshon.

5. No hasi uso di aparato pa mula kuminda

No pone aparato pa mula kuminda den e desagwe di awa shushi. Esaki pasobra e ta sòru pa un kantidat grandi di shushi i lodo ku por senk, ku un separadó di vèt no por prosesá. E lodo akí bo tin ku saka atrobe for di e separadó di vèt.

Reglanan di kalkulashon pa un separadó di vèt

Pa determiná kua separadó ta nesesario (determina tamaño) por hasi uso di un método di kalkulashon. Wak Kalkulashon di kapasidat di un separadó di vèt a base di e tipo di kushina.

Mantenshon

Komo indikashon ku mantenshon ta nesesario, ta usa e siguiente balornan komo regla básiko:

• e espasio pa fangu lodo ta yen te na un máksimo di 50%
• e espasio pa warda vèt (meimei di e skòtnan) ta yen te na na un máksimo di 80%. Esaki ta un kapa di vèt di mas òf ménos 16 cm.

Registrá e mantenshon den un ‘logboek’. Esaki ta konta pa mantenshon na tur instalashon. Na momentu di kontròl nan por pidi pa e informashonnan akí.