Investigashon di medio ambiente na empresanan

E inspektornan di medio ambiente di Servisio Ambiental Hulanda (omgevingsdiensten Nederland) i di Direktorado di Supervishon i Mantenshon di Lei ta ehekutá e investigashon akí. E investigashon ta un aktualisashon di investigashonnan anterior ku a tuma lugá.

Regulashon

Aktividatnan empresarial por tin konsekuensia pa medio ambiente. Pensa riba desperdisio, awa shushi, zonido òf trahamentu ku supstansia ku ta dañino pa e bisindario. Pa redusí e efektonan akí, tin mester di regla di medio ambiente. E reglanan di medio ambiente akí ta formulá den e Dekreto di Establesimentu i Aktividat BES (Inrichtingen en activiteitenbesluit BES - IAB BES). Segun espektativa e regulashon ta drenta na vigor dia 1 di yanüari 2024. Den e regulashon tin disposishon di medio ambiente òf medida. Esakinan ta por ehèmpel:

• un operashon empresarial limpi i ordená (good housekeeping)
• un tanki séptiko pa awa shushi si no tin konekshon riba kloaka
• un baki pa fangu líkido dañino ku ta lèk
• disponé di un instalashon pa separá vèt den kushina pa protehá e kloaka i e purifikashon di awa shushi kontra depósito di vèt

E reglanan ta den e konsepto di Areglo di Establesimentu i Aktividat BES i ta elaborá nan mas aleu den un ordenansa insular Dekreto di Establesimentu i Aktividat BES Boneiru.

E investigashon di medio ambiente

E investigashon di medio ambiente ta identifiká kua ta e disposishonnan i medidanan ku empresanan a tuma kaba. Esaki ta duna un mihó bista di kua ta e invershonnan ku ainda mester hasi pa por kumpli ku e reglanan di e Dekreto di Establesimentu i Aktividat BES. E investigashon lo dura en total mas òf ménos 8 siman.

Mas informashon

Pa pregunta tokante e reglanan di medio ambiente bo por bishitá e Punto di Informashon Medio Ambiente ku ta ubiká na Kámara di Komèrsio. E ta habrí riba dianan di trabou di 08.00 or pa 12.00 or. Bo por hasi bo pregunta tambe riba wèpsait di e Punto di Informashon Medio Ambiente i lesa e regulashon di medio ambiente ku ta na kaminda.