Apertura punto di informashon medio ambiente na Kámara di Komèrsio Boneiru

Dia 15 di sèptèmber último e ‘Punto di informashon medio ambiente’ a ranka sali na Kámara di Komèrsio. E Punto di informashon medio ambiente ta un kolaborashon entre Entidat Públiko Boneiru, ministerio di Infrastruktura i Maneho di Awa i Kámara di Komèrsio. E punto di informashon akí ta duna informashon na empresarionan tokante e Dekreto di Establesimentu i Aktividat BES (Inrichtingen- en activiteitenbesluit BES -IAB BES). E dekreto ta regla e regulashon ku mester protehá medio ambiente komo konsekuensia di aktividat empresarial i segun ekspektativa e ta drenta na vigor entrante 1 di yanüari 2023.

Pa medio di e reglanan di medio ambiente akí empresanan por emprendé na un manera sostenibel i medio ambiente, naturalesa i ambiente di biba di hende i bestia ta bira mas limpi i mas seif. E dekreto ta sòru tambe pa ménos preshon di regulashon i ménos peso atministrativo pa motibu ku ménos empresa tin ku pidi un pèrmit. Na e momentu akí ta konta pa empresanan ku ta pone preshon riba medio ambiente ku nan tin mester di un pèrmit di medio ambiente segun e Ordenansa di Molèster (Hinderverordening).

Pa mayoria empresa un obligashon di notifikashon i reglanan general lo bini na vigor i algun empresa mas grandi lo tin ku hasi petishon pa pèrmit. E Punto di informashon medio ambiente ta bai splika empresarionan den kua kategoria nan (ta bai) kai i kua ta e reglanan di medio ambiente ku ta bai konta pa nan aktividatnan empresarial.

E bali ta disponibel pa pregunta di empresanan individual i lo tene seshon di informashon tambe pa kada sektor. Via e kanalnan di informashon di Kámara di Komèrsio lo anunsiá esakinan.

E Punto di informashon medio ambiente ta establesé den hal di Kámara di Komèrsio na Kaya Amsterdam 23 i e ta habrí tur dia for di 08:00 or te 12:00 or. Pa informashon mas amplio konsultá e wèpsait www.infomilcn.com.